02.12.08: Om lag 51 000 hushaldskundar skifta kraftleverandør i tredje kvartal. Det er over 6 000 fleire skifte enn i førre kvartal og over 12 000 fleire samanlikna med tredje kvartal i fjor.
Kamp om kundane blant kraftleverandørene. Foto: Ringeriks-kraft.
Vi må tilbake til første kvartal i 2007 for å finne eit høgare tal på skifte. – Auken kan ha samanheng med at det har vore stor prisvariasjon mellom kraftleverandørane, seier avdelingsdirektør Marit Lundteigen Fossdal i NVE.
I 3. kvartal 2008 har prisen på spotpriskontrakt i Sør-Noreg i snitt vore høgare enn prisen på standard variabel kontrakt. I tillegg har det vore stor prisvariasjon blant leverandørar som tilbyr standard variabel kontrakt. Undersøkinga viser mellom anna at snittdifferansen mellom dyraste dominerande leverandørar og billegaste landsdekkjande leverandørar var 39,6 øre/kWh i 3. kvartal 2008.
Over 40 prosent vel spotpris
Framleis har flest hushald standard variabel kontrakt, sjølv om denne delen er på veg ned. Medan 85 prosent av hushalda hadde slik kontrakt 1. kvartal 2003, ligg gjennomsnittet for dei fire siste kvartala på 47,8 prosent. Samstundes har talet på hushald med spotpriskontrakt auka kraftig dei siste åra, og utgjorde 42,3 prosent i snitt i dei siste fire kvartala.
Også auke i næringsmarknaden
Også i næringsmarknaden var det ein oppgang i talet på leverandørskifte i 3. kvartal 2008. 4 400 næringskundar skifta leverandør i løpet av kvartalet. Dette er ein oppgang på over 15 prosent frå førre kvartal, då 3 800 skifta leverandør. (NTB)
